PantunMinang

Kumpulan #PantunMinang Edisi “LADO”

pANTUNmINANG

Salamaik datang di program pantun pertama secara live di twitter.. inilah dia #PantunMinang

#PantunMinang hadir di timeline dunsanak tiok rabu malam mulai jam 21.30 Wib malam

Sabalun masuak tema #PantunMinang, ambo nio maingek an tentang aturan main #PantunMinang, disimak:
1. wajib pakai hestek #PantunMinang
2. Pantun indak buliah manganduang unsur pornografi dan SARA
3. Usahokan #PantunMinang nan sanak buek pas 140 karakter tamasuak hashtagnyo #PantunMinang. Buliah dimentionkan, buliah indak.
4. #PantunMinang yang dibuek, sesuaikan dengan tema. Tema diumumkan jam 21.30 Wib, sekaligus menandai mulainyo #PantunMinang.
5. Indak sadolah #PantunMinang bisa di-RT. Kalau di RT sadonyo kanai limit tweet. Jadi nan ndak di RT jan bakaciak hati lo
6. Untuak dunsanak nan ndak ikuik #PantunMinang jan dicopas #PantunMinang sanak kito. Gunoan fitur retweet/RT di twitter.
Untuak malam kini (12 November 2014) #PantunMinang diagiah tema “LADO”

  1. Lado kutu lado karitiang | samo maha kaduonyo | bialah makan sahari sapiriang | asa lai udah kapalo rumah tanggonyo – @tilofa
  2. Samba lado jo uok patai | Sero dimakan di malam hari | Sabana malang nasibnyo denai | Tiok dikakok indak manjadi – @arief_aliet
  3. Lado ijau lado sirah | samo padeh ka duonyo | Bia awak ndak salah arah | rajin-rajin batanyo – @Ranggantengboco
  4. Hari hujan di sanjo rayo | makan Lamak jo Samba Lado | baa hati indak taibo | alah ditangan dirabuik Juo – @AnshariFebi
  5. Ka parak batanam lado | lado ditanam di lahan laweh | mumpung masih mudo | mari kito karajo kareh – @tilofa
  6. Ka bukik mananam jariang | ka lurah mananam lado | La banyak karuik di kaniang | Maliek adiak ka basandiang duo – @rifki_mufc
  7. Si Alang manjua lado | Lado bakawan jo karupuak sanjai | Alah paniang kapalo ambo | Dek mamikia tugas ndk salasai-salasai – @ongkiprinanda
  8. Hari malam mamakan tomaik | Tomaik dibalah untuak samba lado | Pamanih kalam ucap salamaik | Awal bismillah pambukak kato – @arief_aliet
  9. Pai pasa mambali lado | singgah santa tampek da tuah | Jaman kini sabana bedo | salah kaji pangana barubah – @Carito_Lamak
  10. Uwok patai jo abuih garundang | di makan dek si pono | punyo sumando yang kacang miang | elok di pungkang jo batu lado – @SatriaPerdana28
  11. Sambalado jo uok patai | Ondeh iyo sabana sero | Baa pangana indak ka sansai | Urang karajo awak mangango – @Elvizsyahputra1
  12. Usah dipakai baju batiak | Kalo untuak pai raun | Hargo lado samakin naiak | Hargo diri jan sampai turun – @BangBocet
  13. Lado mudo dari piaman | Bali di pasa kurai taji | Kalaulah lapeh kasiah pujaan | Usah manangih baribu hari – @arief_aliet
  14. Kok dulu batanam lado | Tapi kini alah ditabang | Kok dulu awak nan punyo | Tapi kini lah ditangan urang – @arief_aliet
  15. Gulai jariang uok patai | Dimakan jo sambalado tanak | Hati ko lah sabana takanai | Kiro nyo awak badunsanak [email protected]
  16. Kaparak maambiak lado | baok kabalai jo oto puso | kana-kana kecek iwan prayitno | kurangi makan lado – @rankphily
  17. Samba lado di dalam peti | Siang dimakan barami rami | Kok hilang tambatan hati | Gasiang tangkurak agiah batali – @arief_aliet
  18. Baok oto isinyo kasiak | kasiak di baok ka bengkulu |karano lado nan sadang naiak | baralek kito di tundo dulu – @Has_Tanjung
  19. Nasi di tanak di ateh tungku | uok lado manompang pulo | usah takuik ijanlah ragu | isuak lai untuang kito basuo – @rankphily
  20. Jauah bajalan ka payokumbuah | singgah sabanta di pasa baso | kini makan jarang batambuah | dek mahanyo si samba lado – @rankphily
  21. Naiak sampan baraja mandayuang | sampan dikabek jo basi rantai | yo taragak pulang ka kampuang | makan sambalado jo uok patai – @arief_aliet
  22. Samba lado makan jo patai | Di makan anak rang mudo-mudo | Bialah kini badan marasai, Untuang isuak babini duo – @Boerrahman
  23. Jarum panjaik nio di atua | di ateh meja ado samba lado | Talambek sampai di kantua | dek gara-gara urang demo – @ariesta_ferline
  24. Padeh lidah mamakan lado | lado dimasak dek urang Kapau | Badabuah raso di dado | adiak malengah katiko den imbau – @misterdaft
  25. Kalo ado lado busuak | Jan simpan di dalam lamari | Kok indak bajodoh kito bisuak | Itu alah suratan Illahi – @BangBocet
  26. Makan bakuah jo samba Lado | dimakan sapiriang baduo | selamat hari ayah untuak apa di sarugo | tarimokasih untuak cintonyo – @imahfahmi
  27. Nasi sapiriang makan baduo | makan batambuah jo samba lado | antah iyo antah kok tido | ado rasaki uda pinang juo – @rankphily
  28. Urang sariak batanak lado | dimakan urang sadang mairiak | sabana sarik mancari nan mudo | tiok diolah urang maambiak – @fajarscoatident
  29. bali ikan di pasa piaman | jan lupo mambali sala | marilah kito bacari kawan | supayo kito ndak dapek bala – @f_mursyid
  30. Ka jakarta makan patai | ditambah pakai sambalado | ntah bilo wisuda ka sampai | buek ibo hati rang tuo – @MRasri

loading...
Komentar

Trending

To Top
Loading...